ARDF Event am August

Den ARDF Working Group informéiert, dass och dëst Joer rëm eng national Fuussejuegd organiséiert gëtt. Den Datum steet scho fest, et ass Sonndes den 20. August. Dëst ass e bësse méi spéit wéi d’lescht Joer, mee och wéi d’lescht Joer sollt se rëm no de HAM RADIO zu Friedrichshafen sinn, dass intresséiert Leit sech do nach eventuell kéinten ee passenden Empfänger oder Literatur besuergen. D’Messe zu Friedrichshafen ass dëst Joer jo bekanntlecherweis ee Mount méi spéit wéi di Jore virdrun. D’Fuussejuegd wäert rëm am 80 Meter Band organiséiert ginn. Weider Detailer wäerten op der Homepage publizéiert ginn, soubal ze fest stinn.

Als Preparatioun fir des Fussejuegd wäerte mer während dem ClubOwend vum Juni, also Freides den 30. Juni ab 19:30 een ARDF Workshop organiséieren, wou intresséiert Memberen souwuel eng theoretesch wéi och eng kleng praktesch Introductioun an d’Fuussejuegd kréien. Leit déi een eegenen Empfänger hu kennen dee mat bréngen fir en ze testen, fir déi aner huet den RL e puer Geräter zur Verfügung.

Monatsversammlung vum RL

Nodeems déi läscht Monatsversammlung jo aussergewéinlecherweis zu Leideleng war, ass no enger klenger Renovatioun d’Lokal vum Bauremusée zu Peppeng lo rëm op. D’Monatsversammlung vum Mëttwoch 7. Juni wäert also rëm wéi üblech zu Peppeng stattfannen.

Lizenzen vum ILR

Lëtzebuergesch Den ILR hat jo ee gewëssene Retard annoncéiert fir déi erneiert Lizenzen ze verschécken fir déi ze ersetzen déi Enn 2016 ausgelaf sinn. Mëtt Mäerz misste lo awer all d’Lizenze bei de betraffenen LX-Amateuren ukomm sinn. Falls een nach keng Lizenz-Käertche geschéckt krut, soll e sech direkt beim ILR oder beim Comité vum RL mellen, fir ze kucken wat do schief gelaf ass.

YOTA Month - LX4YOTA 2016

Lëtzebuergesch Am Kader vum Youngsters On The Air Working Group vun der IARU Region 1 ass vum 1. bis den 31. Dezember 2016, genau wéi d’läscht Joer, rëm de YOTA Mount. An deem Mount sollen international, speziell Jugend-Statioune QRV ginn, fir d’Äiss e bëssen ze briechen, dass jonk Leit rëm méi de Mikro an de Grapp huelen. Lëtzebuerg wäert viraussiichtlech rëm mam Ruffzeechen LX4YOTA matmaachen.

Jonk Memberen si wëllkomm fir dat Ruffzeeche während engem oder e puer Deeg ze aktivéieren. Falls dir jonk Leit kennt déi nach keng Lizenz hunn an déi sech awer fir den Hobby intresséieren, ass dëst och d’Geleeënheet fir dass si et mol zesumme mat engem vun eise Youth-Koordinatoren eng Kéier kennen ausprobéieren. 

Falls der intresséiert sidd kennt der iech beim Youth-Working Group am beschte per Mail op mellen.

Méi Informatioune fennt een op der offizieller YOTA Websäit.

English In order to promote amateur radio amongst young people, the Youngsters On The Air Working Group IARU Region 1 inititated the YOTA Month from December 1st to December 31st, 2016. Luxembourg will likely participate with the callsign LX4YOTA, which youngsters can activate during a few days.

If you are interested to participate, please don't hesitate to contact our Youth-Working Group per email via .

You'll find more details on the official YOTA Site.

60 Meter Band

Lëtzebuergesch Zanter dem 10. Oktober 2016, ass et zu Lëtzebuerg och erlabt dat neit 60m Band am Service Amateur ze benotzen. De Frequenz-Plang vum 3. Oktober deen den 10. Oktober am Mémorial publizéiert ginn ass, erlabt et, fir et vun 5351.5 bis 5366.5 kHz à titre secondaire mat enger "Puissance apparente rayonée" vu 15W ze benotzen.

English Since October 10th, 2016, the new 60m band is allowed to be used in Luxembourg for amateur radio use. The frequency plan of 3rd October, published in the Mémorial on 10th October, allows the use from 5351.5 to 5366.5 kHz on a secondary basis with an "Effective radiated Power" of 15W.